"بلادي بلادي بلادي
لـكِ حُـبي وفـؤادي
مـصــر يـا أم البـلاد
أنـت غايتـي والـمُـراد
وعلى كل العـباد
كـم لنيـلك من أيادي
مـصـر أنتِ أغلى دُرَّة
فـوق جبين الدهـر غُــرَّة
يا بلادي عيشـي حُــرَّة
واسلمي رغـم الأعادي"
- بداية يا أحباب.. فيه ناس - للأسف - عندها حساسية لكلمة "مصر" قوي.. وأول ما بيسمعوها بيحصلهم حاجات عجيبة.. وبتسمع منهم كلام غريب.. وتون صوتهم بيتحول على طول لنغمة نشاز قوي.. تصدقوا إن فيه عيال ملهاش أي 60 لازمة بينطقوها ماثر وأحياناً ماسر.. وطبعاً دول من أنصار فتح باب الحريات على سداح مداح.. يعني كل واحد من الشعب يعمل ما بداله.. وتبقي الدنيا بزرميط.. ميضرش.. ماهي ميغة.. المهم سيدهم وتاج راسهم اللي بره يكون راضي عليهم.. ومبسوط منهم.. أصل لا يمكن أفهم ولا أصدق إن فيه إنسان طبيعي محترم يتريق على اسم بلده.. ولا أيه؟
- لأ ميصحش.. الوطن
في مقام الأم.. وأغلى من الولد..
- ولما يكون وطنك
ربنا ميزه عن جميع الأوطان.. ودي حقايق يعرفها الجاهل قبل العالم.. والبعيد قبل
القريب.. والعدو قبل الحبيب..
- فعلاً عندك حق..
بس قول وعرفهم.. يمكن بعضهم يكون مغيب أو طايش؟
- حاضر.. نقول من
باب التذكرة والتفهيم لاللي مسمعش أو لاللي عامل عقله تخين..
- قول يا أستاذ
قول..
- شوف يا محترم.. المؤرخين اختلفوا على أصل تسمية "مصر" بمنطوقها
ورسمها باللغة العربية.. بعضهم يعتقد أنه بيعود لأصول عربية.. علشان كلمة "مصر"
معناها (قُطر) والجمع (أمصار).. والبعض الآخر بيرجحوا إن كلمة "مصر" جايه
من لغتنا المصرية القديمة من كلمات (مجر) أو (مشر) واللي معناها المكنون أو
المحصّن.. وده علشان "مصر" لها حدود طبيعية مؤمنة بفضل الله عز وجل..
وهنا نلاحظ أن الشين والجيم تم استبدالهم بالصاد لتسهيل النطق باللغة العربية.
- طيب مش "مصر"
ربنا سبحانه وتعالى ذكرها في القرآن الكريم؟
- أيوه طبعاً.. وكمان
ذكرها عز وجل في التوراة.. ومن حوالي 8 أو 9 قرون فاتت والمؤرخين ذكروا اسماء كتير
لمصرنا الحبيبة.. فبعضهم شايف إن كلمة "مصر" تشبه كلمة (ميتزرايم) في
اللغة العبرية.. وتشبه (مصرو) كلمة في اللغة الأكادية وبتترجم عندهم على أنها
الحدود.. ومن أسماء "مصر" بردو (مصور)، (مصرايم)، الخ.. كمان فيه أراء
بتقول إن "مصر اتسمت على اسم (مصريم) بن مركائيل بن دواييل بن غرياب بن آدم..
وفهناك رأي تاني بيقول انها اتسمت على اسم (مصرام) بن نقراوش الجبار بن مصريم. أما
الرأي التالت فيقول إن على اسم (مصر) بن بيصر بن حام بن نوح.. وده حصل بعد حدوث
الطوفان.
- أومال ليه في بلاد بره
مش بيسموها "مصر"؟ بيقول عليها مش عارف أيه!
- في الأصل يا عمنا المصريين
القدماء اختاروا اسم (حت- كا- بتاح).. يعني (معبد بتاح) لبلدهم.. وكان الاسم ده بتينطق
باللغة اليونانية - حسب طريقتهم - (ايجوبتس - (Aegyptos .. ومنه خادت اللغة الإنجليزية
اسم "مصر" الحالي والمعروف بـ (إيجيبت - (Egypt.. بردو لازم تعرف
إن قدماء المصريين سموها (كمت) وده كان أكتر اسم شائع ومستخدم بينهم.. وإن (كمت) بتدل
على خصوبة الأرض الزراعية حوالين نهر النيل وفي الدلتا.. كمان قالوا عليها (دشرت) بمعنى
الأرض الحمراء أو الصحراوية.. علشان أغلب مناطقها عبارة عن صحرا.. واسم (تاوى) بمعنى
الأرضين.. وكان قصدهم الصعيد والدلتا.. الشمال والجنوب يعني.. واسم (ايدبوى) بمعنى
(الضفتين).. وكان قصدهم الضفة الشرقية والغربية لنهر النيل طبعاً.. واسم (تا ماري)
اللي معناه أرض ضفة نهر نفسه.
-
ياه.. دي كان لها اسامي كتيرة قوي!
- لكن من بعد ما
نزل القرآن الكريم على سيدنا رسول الله (صل الله عليه وسلم) ذكرها رب العزة بلفظ
(مصر) نطقاً.. وكتابة.. وكان لازم من وقتها الكل يذعن ويدعوها (مصر) نطق وكتابة..
- أنا معاك في
الكلام ده والله يا أستاذ..
- أنا عندي فكرة..
أو للدقة نقول اقتراح.. وللأمانة العلمية لما بحثت شويه لقيت بردو الباحث في علم المصريات والمؤرخ المحترم (بسام الشماع) كان اقترح نفس الفكرة من مدة.. وبالتأكيد الفكرة دي من
البديهيات اللي ممكن تيجي على بال أي مصري بيعشق "مصر".. وهي باختصار إن
مصر متمثلة في الحكومة تخاطب الأمم المتحدة ومنظماتها المختلفة.. وباقي المنظمات
الدولية المعروفة.. وكمان كل دول العالم من خلال وزارة الخارجية والهيئة العامة
للاستعلامات إن إيجيبت أو ايجيبتوا أو أياً كان منطوقها في كل لغة بقت (مصر - Misr).. وإن أي
مراسلة أو مخاطبة أو مكتوب رسمي لازم يتضمن ده وإلا فلن يلتفت إليه في التعاملات
بين مصر وبينهم وذلك لاعتبارات تخص الأمة المصرية وحدها..
- وأيه بقى الميزة
في ده؟
- أقولك يا عمنا..
الفايدة الأولى هي إن مصر زي ما كلنا عارفين مذكورة في كتاب ربنا عز وجل.. وهي
بالدليل النقلي والعقلي بقعة مباركة ومحببة لرب العالمين ولسيدنا رسول الله ولعدد
من أنبياءه عليهم جميعا صلوات الله ورحماته ورضوانه.. وده معناه إننا مبدئياً
هننول الشرف العظيم بمطابقة اسمها في الواقع حول العالم بالمذكور في القرآن
الكريم..
- وثانياً؟
- اجبار الآخرين
أنهم يعاملوك على أساس اسمك ده بوضعه ده.. لإن فيه دول ومنظمات سرية وجماعات بردو
سرية مبتتمناش أي خير لمصر.. ومتحبلهاش الشرف ده وبتنكره بكل وسيلة ممكنة.. وإحنا
طبعا لازم نفكرهم باسمها المرتبط بالشرف ده ديما وفي كل لحظة..
- فهل ممكن ينطق أي
مدينة أو بلد مذكورة في القرآن على غير نطقها الصحيح؟ أو تتكب على غير رسمها
الصحيح؟
- لا..
- طيب لو ده حصل..
نقول عليه أيه؟
- تحريف طبعاً..
- برافو عليك..
تحريف واضح لكلام اتذكر في كتاب الله العزيز.. فهل ممكن نكتب (مكة) على
صورة (ماكا) على سبيل السخرية أو التقليل من شأنها؟
- لا طبعاً..
- طبعا لأ.. ربنا
سبحانه وتعالى بيحب مصر وبيحب مكة وكرمهم في كتابه العزيز فإزاي إنت يا شيء تتريق
على اللي ربك كرمه؟
-
يا ويل اللي عمل كده من عذاب
من خلق مصر.. وكرم مصر.. وشرف مصر..
- عند حق والله.. وأوعى حد يقولي ده خلاف سياسي.. الخلاف السياسي له القنوات الشرعية اللي يتم التعبير فيها عن وجهات النظر المختلفة.. لكن تزييف التاريخ والتريقة على الثوابت والتقليل من قيم الوطن معنديش ليه مسمى إلا "خيانة للوطن".. توصل في رأي المتواضع لدرجة "العظمى".. ويا ترى مين ورا ده؟ ومين المستفيد من ده؟ الكل بقى عارف.. واللي مش عارف يشغل مخه شويه وهو هيفهم أكيد..
والسلام على جناح المحبة أحلى ختام،،،،
(تمت)